سنڌ جي وڏي وزير 15 آڪٽوبر 2026ع کان 12500 رپيا في 100 ڪلوگرام ٻوري جي رعايتي قيمت تي سرڪاري ڪڻڪ جاري ڪرڻ جي منظوري ڏئي ڇڏي

ڪراچي-07 آڪٽوبر (اي پي پي) سنڌ جي وڏي وزير سيد مراد علي شاهه اربع ڏينهن اٽي جي قيمتن کي مستحڪم ڪرڻ، مارڪيٽ ۾ دستيابي کي يقيني بڻائڻ ۽ صارفين کي رليف فراهم ڪرڻ جي صوبائي حڪومت جي ڪوششن جي حصي طور 15 آڪٽوبر 2026ع کان 12500 رپيا في 100 ڪلوگرام ٻوري جي رعايتي قيمت تي سرڪاري ڪڻڪ جاري ڪرڻ جي منظوري ڏئي ڇڏي آهي. اهو فيصلو وزيراعليٰ هائوس ۾ کاڌ خوراڪ کاتي جي هڪ اجلاس جي صدارت ڪندي ڪيو ويو. اجلاس ۾ صوبائي وزيرن مڪيش ڪمار چاولا، ڄام خان شورو ۽ مخدوم محبوب زمان، صلاحڪار گيانچند ايسراڻي، چيف سيڪريٽري آصف حيدر شاهه، وڏي وزير جو سيڪريٽري آصف جيلاني، سيڪريٽري خوراڪ غلام عباس نائيچ ۽ ٻين سينئر اختيارين شرڪت ڪئي. سڄي صوبي ۾ ڪڻڪ جي ذخيرن جي صورتحال جو جائزو وٺندي وڏي وزير خوراڪ کاتي کي هدايت ڪئي ته 15 آڪٽوبر کان ڪڻڪ جاري ڪرڻ جو عمل شروع ڪيو وڃي ۽ مارڪيٽ جي لاڙن جي ويجهڙائي سان نگراني ڪئي وڃي ته جيئن سرڪاري مداخلت جو فائدو اٽي جي گهٽ قيمتن ذريعي صارفين تائين پهچي سگهي. اجلاس دوران خوراڪ کاتي پاران موجوده سال دوران جاري ڪرڻ لاءِ دستياب ڪڻڪ جي ذخيرن جو جامع جائزو پيش ڪيو ويو ۽ ان جي گذريل سال جي ورهاست جي انگن اکرن سان ڀيٽ ڪئي وئي. خوراڪ واري وزير مخدوم محبوب زمان ڪميٽي کي آگاهه ڪيو ته هن وقت مختلف ضلعن ۾ صوبائي ذخيرن ۾ ڪل 346414 ميٽرڪ ٽن ڪڻڪ دستياب آهي. وڏي وزير کي وڌيڪ آگاهه ڪيو ويو ته پاسڪو کان 190000 ميٽرڪ ٽن ڪڻڪ ۽ 300000 ميٽرڪ ٽن درآمدي ڪڻڪ صوبائي پول ۾ شامل ڪئي ويندي، جنهن سان جاري ڪرڻ لاءِ دستياب ڪڻڪ جو ڪل مقدار وڌي 836414 ميٽرڪ ٽن ٿي ويندي. بريفنگ موجب ڪراچي ڊويزن وٽ هن وقت 135948 ميٽرڪ ٽن ڪڻڪ موجود آهي، جيڪا پاسڪو ۽ درآمدي ذخيرن جي آمد کانپوءِ وڌي 565948 ميٽرڪ ٽن ٿي ويندي. ان کان علاوه، پاسڪو جي ذخيرن مان حيدرآباد ريجن لاءِ 30000 ميٽرڪ ٽن ۽ ميرپورخاص ۽ شهيد بينظير آباد ريجنز لاءِ 60000 ميٽرڪ ٽن ڪڻڪ مختص ڪئي وئي آهي. چيو ويو ته گذريل سال دوران صوبي مارڪيٽ ۾ 947982 ميٽرڪ ٽن ڪڻڪ جاري ڪئي هئي. پاسڪو ۽ درآمدي کيپن مان اضافي ذخيرن سان مارڪيٽ جي سپلاءِ مضبوط ٿيڻ ۽ قيمتن ۾ واڌ ۽ لاٿ کي روڪڻ ۾ مدد ملڻ جي اميد آهي. اجلاس کي اهو به ٻڌايو ويو ته ڪراچي جي اوپن مارڪيٽ ۾ ڪڻڪ هن وقت لڳ ڀڳ 13200 رپيا في 100 ڪلوگرام جي حساب سان وڪرو ٿي رهي آهي، جڏهن ته پرچون ۾ اٽي جي قيمت 165 کان 170 رپيا في ڪلو جي وچ ۾ آهي. پهرين آڪٽوبر تي ڪڻڪ 12400 رپيا في 100 ڪلوگرام تي هئي ۽ اٽي جي قيمت 160 کان 165 رپيا في ڪلو جي وچ ۾ هئي، جيڪا مسلسل وڌندڙ لاڙي کي ظاهر ڪري ٿي. ذخيرن جي دستيابي، سبسڊي جي اثرن ۽ مارڪيٽ جي حالتن جو جائزو وٺڻ کانپوءِ وڏي وزير 12500 رپيا في 100 ڪلوگرام ٻوري جي حساب سان ڪڻڪ جاري ڪرڻ جي منظوري ڏني ۽ هدايت ڪئي ته جاري ڪرڻ جو عمل 15 آڪٽوبر 2026ع کان شروع ڪيو وڃي. هن ان ڳالهه تي زور ڏنو ته حڪومت جو بنيادي مقصد ڪڻڪ جي اڻٽٽ سپلاءِ کي يقيني بڻائڻ، قيمتن ۾ استحڪام برقرار رکڻ ۽ صارفين کي اٽي جي قيمتن ۾ حد کان وڌيڪ اضافي کان بچائڻ آهي.