صوماليه جي سمنڊ ڪناري ويجهو هاءِ ڪيل ٿيندڙ ايم وي آنر 25 جي پاڪستاني عملي جي 4 ميمبرن کي حفاظت سان بازياب ڪرايو ويو آهي: اسحاق ڊار

اسلام آباد – 02 آڪٽوبر (اي پي پي) صوماليه جي سمنڊ ڪناري ويجهو هاءِ ڪيل ٿيندڙ ايم وي آنر 25 جي پاڪستاني عملي جي 4 ميمبرن کي حفاظت سان بازياب ڪرايو ويو. جمعي ڏينهن سماجي رابطي جي ويب سائيٽ ايڪس تي هڪ بيان ۾ نائب وزيراعظم ۽ پرڏيهي وزير سينيٽر محمد اسحاق ڊار چيو ته پرڏيهي وزارت ۽ جبوتي ۾ پاڪستاني سفارتخاني جي مسلسل ڪوششن جي نتيجي ۾ صوماليه جي سمنڊ ڪناري ويجهو هاءِ ڪيل ٿيندڙ ايم وي آنر 25 جي متاثر 10 پاڪستاني عملي جي ميمبرن مان چار ياسر خان، عقيل خان، امين بن شمس ۽ عثمان غني کي حفاظت سان بازياب ڪرايو ويو آهي ۽ انهن جي 3 آڪٽوبر تي ڪراچي پهچڻ جي اميد آهي. هن چيو ته ٽي پاڪستاني عملي جا ميمبر مرحوم رفيع الله خان، مرحوم سيد ڪاشف عمر ۽ مرحوم محمود احمد انصاري جيڪي افسوسناڪ طور تي پنهنجون حياتيون وڃائي ويٺا، جون ميتون پاڪستان واپس آنديون پيون وڃن، ان سلسلي ۾ سمورين ضروري قانوني ۽ ٻين ضابطاجاتي ڪاررواين کي تيز رفتاري سان مڪمل ڪيو پيو وڃي ته جيئن ان عمل کي جلد کان جلد مڪمل ڪري سگهجي، سوڳوار خاندانن سان دلي تعزيت جو اظهار ڪريان ٿو جيڪي ان انتهائي تڪليف ڏيندڙ وقت مان گذري رهيا آهن. هن چيو ته باقي پاڪستاني عملي جا ٽي ميمبر عمران علي، ياسين محمد ۽ سيد يوسف حسين ڪپتان سان گڏ بدستور جهاز ۾ موجود آهن، اسان انهن جي حفاظت سان بازيابي ۽ جلد کان جلد وطن واپسي جي لاءِ دوست ملڪن سان فعال طور تي رابطو ۽ تعاون ڪري رهيا آهيون. اسحاق ڊار چيو ته وزيراعظم محمد شهباز شريف جي قيادت ۾ پرڏيهي وزارت ان معاملي تي پوري طرح ڌيان ڏئي رهي آهي ۽ سمورن پاڪستاني شهرين بشمول فوت ٿيندڙن جي ملڪيتن جي جلد کان جلد واپسي يقيني بڻائڻ جي لاءِ مسلسل هر ممڪن ڪوشش ڪري رهي آهي ۽ متاثر خاندانن کي هر ممڪن تعاون فراهم ڪندي رهندي.