وزيراعظم پاران ايف بي آر سڌارن تي عملدرآمد وڌيڪ تيز ۽ ان لينڊ روينيو جي لاءِ تجويز ڪيل فيس ليس نظام جي وقت سر تڪميل جي هدايت

اسلام آباد- 10 آگسٽ (اي پي پي) وزيراعظم محمد شهباز شريف ايف بي آر سڌارن تي عملدرآمد وڌيڪ تيز ۽ ان لينڊ روينيو جي لاءِ تجويز ڪيل فيس ليس نظام جي وقت سر تڪميل جي هدايت ڪندي چيو آهي ته ايف بي آر چيئرمين ۽ سينيئر آفيسر هر مهيني ڪراچي سان گڏ لاهور ۾ به ٻه ڏينهن رهن، سمورين حساس جاين تي سٺي شهرت رکندڙ ۽ ايماندار آفيسر ۽ اهلڪار مقرر ڪيا وڃن. وزيراعظم آفيس جي ميڊيا ونگ پاران جاري بيان موجب وزيراعظم جي صدارت ۾ ايف بي آر ۾ جاري سڌارن تي هفتيوار جائزه اجلاس سومر ڏينهن ٿيو. اجلاس کي خطاب ڪندي وزيراعظم ايف بي آر سڌارن تي عملدرآمد تيز ڪرڻ جي هدايت ڪئي. هن چيو ته ڪاروباري برادري جي جاري ٽيڪس سڌارن تي وڌندڙ اعتماد جي آجيان ڪريون ٿا. وزيراعظم حڪم ڏنو ته ايف بي آر چيئرمين ۽ سينيئر آفيسر هر مهيني ڪراچي سان گڏ لاهور ۾ به ٻه ڏينهن قيام ڪن، ايف بي آر مقرر روينيو هدف حاصل ڪرڻ جي لاءِ انفورسمنٽ قدم تيز ڪري. وزيراعظم ايف بي آر کي اسمگلنگ، ٽيڪس چوري ۽ غيرقانوني ڪاروبار جي خلاف موثر انفورسمنٽ جاري رکڻ جي هدايت ڪئي. هن ايف بي آر پاران چڪوال ۽ صوابي ۾ سگريٽ سازي جي غيرقانوني فيڪٽرين جي خلاف قدمن جي واکاڻ ڪئي. وزيراعظم ايف بي آر کي سمورين حساس پوسٽن ۽ کاتن ۾ سٺي شهرت رکندڙ ۽ ايماندار آفيسرن ۽ اهلڪارن جي مقرري جي هدايت ڪئي. هن حڪم ڏنو ته ان لينڊ روينيو جي لاءِ تجويز ڪيل فيس ليس نظام جي وقت سر تڪميل ۽ فيس ليس نظام جو مڪمل رول آئوٽ 2027ع تائين يقيني بڻايو وڃي. وزيراعظم کي بريفنگ ۾ ٻڌايو ويو ته فيس ليس ان لينڊ روينيو نظام جو پهريون مرحلو پهرين آڪٽوبر 2026ع کان فعال ٿيندو، ايف آءِ ۽ جديد ٽيڪنالاجي تي ٻڌل فيس ليس نظام ايف بي آر جي تازي ڊيجيٽائيزيشن سڌارن جو اهم حصو آهي، ان نظام ۾ ٽيڪس گوشوارن جي اڊٽ جي لاءِ نيشنل فيس ليس آڊٽ ونگ ۽ اسيسمنٽ جي لاءِ فيس ليس اسيسمنٽ يونٽ شامل آهن. بريفنگ موجب فيس ليس نظام ۾ ٽيڪس ڪيسز جو دائره اختيار جاگرافيائي حدن کان قطعي نظر رينڊم بنيادن تي مختص ڪيو ويندو. ايف بي آر چيئرمين وزيراعظم جي هدايت تي هر مهيني جي پهرين هفتي ڪراچي ۾ قيام ۽ ڪاروباري برادري سان ملاقاتن تي پڻ بريفنگ ڏني جنهن ۾ ٻڌايو ويو ته ڪراچي ۾ 7 وڏن واپاري ادارن جي نمائندن سان ملاقاتون ڪيون ۽ انهن جا مسئلا ٻڌا، ڪراچي ۾ رهڻ دوران ڪاروباري برادري کي درپيش مسئلا فوري حل ڪيا ويا. ايف بي آر چيئرمين ٻڌايو ته برآمد ڪندڙن جي ٽيڪس ريفنڊز جي لاءِ ٽائيم بائونڊ ايس او پيز جاري ڪيا پيا وڃن. وزيراعظم کي ڏني ويندڙ بريفنگ موجب چڪوال ۾ غيرقانوني سگريٽ فيڪٽري جي خلاف انٽيلي جنس بيسڊ ڪارروائي ڪندي فيڪٽري سيل ڪئي وئي، غيرقانوني سگريٽ جو ذخيرو ۽ مشينري قبضي ۾ ورتي وئي، صوابي ۾ به غيرقانوني سگريٽ فيڪٽري جي خلاف انٽيلي جنس بيسڊ ڪارروائي ڪئي وئي. اجلاس ۾ وفاقي وزير سينيٽر اعظم نذير تارڙ، ڊاڪٽر مصدق مسعود ملڪ، احد خان چيما، محمد اورنگزيب، عطاءُ الله تارڙ، شزه فاطمه خواجه، خاص معاون هارون اختر، اسٽيٽ بئنڪ جو گورنر جميل احمد ۽ لاڳاپيل ادارن جا اعلى آفيسر شريڪ هئا.