وڏي وزير سيد مراد علي شاھ جي صدارت هيٺ سکر بئراج جي بحالي ۽ جديدڪاري منصوبي جي ٽئين سال جي اڳڀرائي جو جائزه اجلاس منعقد

ڪراچي -26 فيبروري (اي پي پي)سنڌ جي وڏي وزير سيد مراد علي شاھ سکر بئراج جي بحالي ۽ جديدڪاري منصوبي ايس بي آءِ پي جي ٽئين سال جي اڳڀرائي جو جائزو وٺڻ لاءِ اجلاس جي صدارت ڪئي ۽ ان کي سنڌ جي آبپاشي تحفظ ۽ زرعي معيشت لاءِ انتهائي اهم قرار ڏنو. وزيراعليٰ هائوس ۾ ٿيل اجلاس ۾ آبپاشي وارو صوبائي وزير ڄام خان شورو ۽ سيڪريٽري آبپاشي ظريف کيڙو شرڪت ڪئي. اجلاس دوران وڏي وزير سول، اسٽرڪچرل ۽ مڪينيڪل اپ گريڊ، خاص طور تي بئراج جي تاريخي گيٽن جي وڏي پيماني تي مٽاسٽا تي غور ڪيو ويو. سيڪريٽري آبپاشي وڏي وزير کي سائيٽ تي جاري معائنن ۽ اڳڀرائي بابت بريفنگ ڏني جنهن ۾ ڪوفرڊيم، بئراج پيوومينٽ ۽ لاڳاپيل اسٽرڪچرل جزن تي ڪم شامل آهي. وڏي وزير کي ٻڌايو ويو ته ٽئين سال جي ڪوفرڊيم (فيز ٻيو ۽ ٽيون) بئراج جي ٽن وڏن زونن ۾ ڳري تعميراتي سرگرمين کي ممڪن بڻايو آهي. مڪينيڪل ڪم جو جائزو وٺندي وڏي وزير گيٽن جي تبديلي ۾ نمايان اڳڀرائي کي ساراهيو. موجوده مرحلي ۾ منصوبي هيٺ رٿيل 27 نون گيٽن (گيٽ 15 کان 43 تائين) مان 25 مڪمل تيار ٿي چڪا آهن، جيڪو 96 سيڪڙو کان وڌيڪ تڪميل کي ظاهر ڪري ٿو. زنگ کان بچاءَ لاءِ 19 گيٽن جي پينٽنگ ۽ سينڊ بلاسٽنگ مڪمل ڪئي وئي آهي، جڏهن ته لاڳاپيل حصن ۾ پراڻن هوسٽنگ سسٽمز کي هٽائڻ ۽ موجوده گيٽن جي ڪٽنگ جو عمل پڻ مڪمل ٿي چڪو آهي. ليفٽ بئنڪ ڪينالن جي بحالي جو ڪم نارا ڪينال کانسواءِ 100 سيڪڙو مڪمل ٿي چڪو آهي جڏهن ته نارا ڪينال تي ڪم جاري آهي. ان موقعي تي وڏي وزير آبپاشي کاتي کي نارا ڪينال جي بحالي واري ڪم ۾ تيزي آڻڻ جي هدايت ڪئي. سول ڪم بابت وڏي وزير کي آگاهي ڏني وئي ته رائيٽ پاڪٽ ۾ ڊريجنگ مڪمل ٿي چڪي آهي جڏهن ته ايپروچ چينل ۾ پاڻي جي بنا رڪاوٽ وهڪري کي يقيني بڻائڻ لاءِ ڊريجنگ جاري آهي. زون وار اڳڀرائي موجب زون-1 (اسپين 15 کان 23) ۾ ڊي واٽرنگ، ڊي سلٽنگ ۽ فرش ۽ پئيرز جو جي پي آر سروي مڪمل ٿي چڪو آهي ۽ ڪنڪريٽ اوورلي جو ڪم جاري آهي. زون 2 ۽ 3 ۾ شيٽ پائلنگ ۽ بيڪ فلنگ گهڻي ڀاڱي مڪمل ٿي چڪي آهي جڏهن ته وڌيڪ اسٽرڪچرل مرمت لاءِ ڊي واٽرنگ ۽ ڊي سلٽنگ جاري آهي. سکر بئراج جي اسٽرٽيجڪ اهميت تي زور ڀريندي وڏي وزير چيو ته هي بئراج سنڌ جي آبپاشي نظام جي ريڙهه جي هڏي آهي. نون گيٽن جي تنصيب ۾ درستگي انتهائي ضروري آهي ته جيئن آبپاشي جي وهڪري ۾ رواني برقرار رهي ۽ صدي پراڻي هن ڍانچي جي ڊگهي مدي واري حفاظت يقيني بڻائي سگهجي. هن آبپاشي کاتي کي هدايت ڪئي ته ٽئين سال جي سرگرمين جي رفتار برقرار رکي وڃي ۽ ٽائيم لائن تي سختي سان عمل ڪيو وڃي. مراد علي شاهه وڌيڪ هدايت ڪئي ته فيز ون جا باقي رهيل پنج لسٽ نقطا، جن ۾ گيٽ 44 کان 59 تي معمولي درستي جا ڪم شامل آهن بنا دير مڪمل ڪيا وڃن. اجلاس جي پڄاڻي تي وڏي وزير چيو ته جديدڪاري منصوبي جي وقت سر ۽ معياري تڪميل سنڌ جي آبي تحفظ، زراعت ۽ آبپاشي نظام تي ڀاڙيندڙ روزگار جي تحفظ لاءِ انٽر آهي.