خاتون اول بي بي آصفه ڀٽو زرداري پاران سنائي تاڪائچي کي جاپان جي پهرين عورت وزيراعظم بڻجڻ تي مبارڪباد

اسلام آباد – 22 آڪٽوبر (اي پي پي) خاتون اول بي بي آصفه ڀٽو زرداري جاپان جي نئين چونڊيل وزيراعظم سنائي تاڪائچي کي ملڪ جي پهرين عورت وزيراعظم بڻجڻ تي مبارڪباد ڏني آهي. ايڪس تي پنهنجي پوسٽ ۾ بي بي آصفه ڀٽو زرداري چيو ته سنائي تاڪائچي جو وزيراعظم جي عهدي تي چونڊجڻ قيادت جي ميدان ۾ عورتن جي لاءِ هڪ تاريخي سنگ ميل ۽ جاپان جي لاءِ فخر جوڳو لمحو آهي. هن نيڪ خواهشن جو اظهار ڪندي چيو ته هو اميد ڪري ٿي ته جاپان جي نئين چونڊيل وزيراعظم انهي جرئت ۽ عزم سان پنهنجي عوام جي قيادت ڪندي جيئن شهيد محترمه بينظير ڀٽو جو ميراث آهي جيڪا مسلمان دنيا جي پهرين ۽ پاڪستان جي واحد عورت وزيراعظم هئي.