سماجي شموليت ۽ اداره جاتي احتساب کي قومي ترقياتي ايجنڊا جو حصو بڻائڻ وقت جي اهم ضرورت آهي: احسن اقبال

اسلام آباد-22 آڪٽوبر (اي پي پي) رٿابندي، ترقي، سڌارن ۽ خاص قدمن واري وفاقي وزير پروفيسر احسن اقبال چيو آهي ته پاڪستان ۾ جٽادار ترقي ۽ اثرائتي حڪمرانيءَ جو دارومدار ان ڳالهه تي آهي ته هر شهريءَ کي فيصله سازي جي عمل ۾ شامل ڪيو وڃي. هو اسلام آباد ۾ منعقد آواز ٽو پروگرام جي افتتاحي سيشن کي خطاب ڪري رهيو هو جنهن ۾ سماجي شموليت ۽ اداره جاتي احتساب ۽ عوامي شرڪت کي هٿي وٺرائڻ تي تفصيلي ڳالهه ٻولهه ڪئي. احسن اقبال چيو ته سماجي شموليت ۽ اداره جاتي احتساب کي قومي ترقياتي ايجنڊا جو حصو بڻائڻ وقت جي اهم ضرورت آهي. هن چيو ته ڪو به ملڪ هن وقت تائين حقيقي ترقي نٿو ڪري سگهي جيستائين ان جي پاليسين ۾ عوام جو آواز شامل نه هجي. سندس مطابق شفافيت، شموليت پائيدار حڪمراني جي بنياد آهن ۽ پاڪستان حڪومت انهن اصولن کي پنهنجي سڌارن وارين پاليسين جو حصو بڻائي چڪي آهي. احسن اقبال چيو ته پاڪستان جي ترقيءَ ۾ هر شهري ۽ هر  ڪميونٽيءَ جو ڪردار اڻٽر آهي. اسان عوام جي آواز کي پاليسي سازي جي مرڪز ۾ آڻي هڪ اهڙي معاشري جو بنياد رکي رهيا آهيون جتي ترقي صرف ڪجهه طبقي نه پر سڀن لاءِ هجي. وفاقي وزير چيو ته آواز ٽو پروگرام ڪمزور طبقن، عورتن، نوجوانن ۽ معذور ماڻهن کي پاليسي عمل ۾ شامل ڪري هڪ نئون مثال قائم ڪيو آهي. هن ان پروگرام کي شراڪتي طرزِ حڪمراني کي ڪامياب مثال قرار ڏنو، جيڪو نه صرف سماجي انصاف پر اداره جاتي شفافيت کي هٿي وٺرائڻ ۾ اهم ڪردار ادا ڪري رهيو آهي. احسن اقبال چيو ته حڪومت ملڪ جي ترقياتي سفر لاءِ ”اُڏام پاڪستان“ جي نالي سان هڪ جامع فائيو ايز فريم ورڪ جوڙيو آهي، جيڪو تعليم، روانگي واپار، ماحوليات، توانائي ۽ سماجي برابري جي ٿنڀن تي ٻَڌل آهي. هن چيو ته اُڏام پاڪستان جو مقصد موجوده چئلينجز جي موقعن ۾ بدلائي پاڪستان کي مضبوط، پائيدار ۽ جديد معيشت بڻائڻ آهي. روانگي واپار ۾ واڌ، ڊجيٽل معيشت کي هٿي وٺرائڻ، گرين انرجي ۽ ماحول دوست پاليسين تي عملدرآمد ان ويزن جو حصو آهي. احسن اقبال زور ڀريو ته نوجوانن کي قومي ترقيءَ جي عمل ۾ مرڪزي ڪردار ڏيڻ حڪومت جي پهرين ترجيح آهي. هن ٻُڌايو ته منصوبا بندي واري وزارت ملڪ جي 42 شهرن جي 131 تعليمي ادارن ۾ ينگ پيس اينڊ ڊولپمينٽ ڪور جا يونٽس قائم ڪيا آهن ته جيئن نوجوانن کي امن، قيادت ۽ سماجي ترقيءَ لاءِ تربيت ڏئي سگهجي. هن وڌيڪ چيو ته بااختيار نوجوان انٽرنشپ پروگرام تحت 60 هزار کان وڌيڪ ادا ڪيل انٽرنشپس فراهم ڪئي پئي وڃي، جن مان 10 هزار خاص تي بلوچستان جي نوجوانن لاءِ رکيل آهن. اهڙيءَ طرح يونگ ڊولپمينٽ فيلو پروگرام نوجوان پاليسي ماهرن جي هڪ نئين تيار ڪري رهيو آهي، جيڪا مستقبل ۾ قومي پاليسي سازيءَ جو حصو بڻجندي. وفاقي وزير چيو ته وزارت چيمپئنز آف ريفارمز نيٽ ورڪ قائم ڪيو آهي جنهن ۾ مختلف شعبن جا ماهر شامل آهن جيڪي حڪومت کي پاليسي ۽ سڌارن جي معاملن تي پيشيوراڻي مهارت فراهم ڪري رهيا آهن. هن ان ڳالهه تي اطمينان جو اظهار ڪيو ته هي نيٽ ورڪ حڪومت ۽ ماهرن وچ ۾ هڪ مضبوط پُل جو ڪردار ادا ڪري رهيو آهي. احسن اقبال چيو ته وزارت فيڊرل پبلڪ سروس ڪميشن (ايف پي ايس سي) سان گڏجي سي ايس ايس امتحانن ۾ اردو زبان کي اختياري مضمون طور متعارف ڪرائڻ لاءِ قدم کڻي رهي آهي ته جيئن نوجوان پنهنجي قومي زبان ۾ پنهنجن خيالن جو اظهار ۽ تجزياتي صلاحيتن کي بهتر طور تي پيش ڪري سگهن. وزارت ان عزم جو اظهار ڪيو ته آواز ٽو پروگرام جي ڪامياب ماڊلز کي حڪومتي نظام ۾ شموليت ذريعي جٽادار بڻايو ويندو ته جيئن شراڪتي ترقي ۽ سماجي انصاف جو عمل اداره جاتي سطح تي جاري رهي. احسن اقبال چيو ته جيڪڏهن اسان عوام جي آواز کي پنهنجي پاليسين جو حصو بڻايون ته پاڪستان هڪ مضبوط، منصفاڻي ۽ شفاف معاشري جي شڪل اختيار ڪري سگهي ٿو.