مڪو شريف-14 جون (اي پي پي) مذهبي معاملن واري وفاقي وزير چوڌري سالڪ حسين وفد سان گڏ سعودي هم منصب ڊاڪٽر توفيق بن فوزان الربيعه سان ملاقات ڪئي جيڪا سعودي حج ۽ عمري واري وزارت جي منيٰ ڪيمپ آفيس ۾ ٿي، پاڪستاني وفد ۾ مذهبي معاملن وارو سيڪريٽري ذوالفقار حيدر، حافظ طاهر اشرفي، ڊي جي حج عبدالوهاب سومرو ۽ مڪي شريف بابت ڊائريڪٽر فهيم خان آفريدي شامل هئا. چوڌري سالڪ حسين چيو ته پاڪستاني حاجين جي سهولت لاءِ سعودي حج واري وزير جو خصوصي ڌيان خوشي جوڳو آهي، سعودي حڪومت حج انتظامن ۾ هر سال جدت ۽ نيون سهولتون متعارف ڪرائي رهي آهي. سرڪاري ۽ نجي حج پانڌئيڙن لاءِ سعودي اداري طرفان بهترين سهولتن تي اطمينان آهي. سعودي حج ۽ عمري واري وزير چيو ته منيٰ عرفان ۾ پاڪستان حج مشن جي سمورن ضرورتن جو خيال رکيو ويندو ۽ کين هر ممڪن سهڪار فراهم ڪيو ويندو. مشاعره مقدسه ۾ بهتر سهولتن کي يقيني بڻائڻ لاءِ نجي ڪمپنين جي حوصلا افزائي ڪري رهيا آهيون. مذهبي معاملن واري سيڪريٽري ذوالفقار حيدر چيو ته ايندڙ سال سرڪاري ۽ نجي حج اسڪيم لاءِ ون ونڊو ذريعي رابطا قائم ڪنداسين.
