نيويارڪ-23 نومبر (اي پي پي) آمريڪي اداري فيڊرل بيورو آف انويسٽيگيشن (ايف بي آءِ) نياگرافال ويجهو رين بو بوريج تي ڌماڪي جي جاچ مڪمل ڪندي ان کي ٽريفڪ حادثو قرار ڏنو آهي. روس جي خابرو اداري تاس موجب بفيلو ۾ ايف بي آءِ جي آفيس طرفان ايڪس تي جاري بيان ۾ چيو ويو آهي ته حادثي واري جاءِ تان ڌماڪيدار مواد ناهي مليو ۽ نه ئي ان واقعي ۾ دهشتگردن جي ملوث هجڻ جو ڪو به ثبوب ناهي مليو. بيان ۾ وڌيڪ چيو ويو آهي ته واقعي جي وڌيڪ جاچ مقامي پوليس جي حوالي ڪئي وئي آهي. ان کان اڳ آمريڪي رياست نيويارڪ جي گورنر ڪيٿي هوچل چيو هو ته اربع ڏينهن نياگرافال ۾ آمريڪا ۽ ڪينيڊا وچ ۾ سرحدي ڪراسنگ تي هڪ گاڏي ۾ ٿيل ڌماڪي ۾ دهشتگردن جي ملوث هجڻ جو ڪو به ثبوت ناهي مليو، ان ڌماڪي ۾ ٻه ماڻهو مارجي ويا هئا. نيويارڪ جي گورنر موجب ان واقعي ۾ هڪ مقامي ماڻهو ملوث هو تنهن هوندي به اڃان تائين اهو معلوم ناهي ٿي سگهيو ته هي ڪو حادثو هو يا ڄاڻي واڻي ڪيو ويو هو.
