ڪراچي – 05 مئي (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته فلم انڊسٽري جي بحالي سان انتهاپسندي جي سوچ جي خلاف متبادل بيان جي فروغ ۾ مدد ملندي، معاشري مان انتهاپسندي ۽ عدم برداشت جي خاتمي لاءِ متحرڪ فلم انڊسٽري وقت جي اهم ضرورت آهي، وزيراعظم فلم انڊسٽري جي بحالي ۾ گهري دلچسپي رکي ٿو، حڪومت فلم انڊسٽري جا مسئلا حل ڪندي. اها ڳالهه هن گورنر هائوس ۾ فلم، پروڊڪشن ۽ براڊ ڪاسٽنگ پاليسي 2017ع جي حوالي سان پهرين مشاورتي اجلاس جي افتتاحي تقريب کي خطاب ڪندي چئي، ان موقعي تي مملڪتي وزير مريم اورنگزيب دهشتگردي جي خلاف جنگ ۾ پاڪ فوج ۽ عوام جي ڪارڪردگي کي ساراهيندي چيو ته پاڪ فوج ۽ عوام وڏيون قربانيون ڏنيون آهن. هن چيو ته انهن قربانين کي متبادل بيان جي طور تي پيش ڪرڻ گهرجي.
