اسلام آباد – 22 نومبر (اي پي پي) وزيراعظم عمران خان چيو آهي ته پي ڊي ايم پنهنجي جلسن جي تسلسل تي اصرار ذريعي عوام ۽ انهن جو معاش ڄاڻي واڻي خطري ۾ وجهي رهي آهي، هي لکين جلسا ڪري وٺن پر انهن کي ڪو اين آر او نه ملندو. پنهنجي ٽوئيٽ ۾ وزيراعظم چيو ته پاڪستان ۾ ڪورونا جي وبا جي ٻي لهر جا انگ اکر ڳڻتي جوڳا آهن. گذريل 15 ڏينهن وينٽيليٽرز جي محتاج مريضن جو انگ پشاور 200 سيڪڙو، ملتان 200 سيڪڙو، ڪراچي 148 سيڪڙو، لاهور 114 سيڪڙو ۽ اسلام آباد 65 سيڪڙو وڌي ويو آهي. اسلام آباد ۽ ملتان جا 70 سيڪڙو وينٽيليٽرز استعمال هيٺ آهن. هن چيو ته هن وقت پوري دنيا ٻي لهر جي وڪڙ ۾ آهي ۽ ڪيترائي ملڪ مڪمل طور تي بندشون (لاڪ ڊائون) لاڳو ڪري چڪا آهن.