اسلام آباد – 18 آگسٽ (اي پي پي) وزيراعظم محمد نواز شريف ملڪ مان دهشتگردي جي خاتمي کي حڪومت جي اولين ترجيح قرار ڏيندي چيو آهي ته آپريشن ضرب عضب دهشتگردي جي خاتمي ۾ تمام ڪامياب رهي آهي. هن اها ڳالهه ناروي جي پرڏيهي بورج برينڊي سان ڳالهائيندي چئي جنهن وفد سان گڏ وزيراعظم هائوس ۾ ساڻس ملاقات ڪئي. ناروي جي پرڏيهي وزير ڪوئيٽا سانحي تي ناروي جي وزيراعظم ۽ عوام پاران تعزيت پهچائي. وزيراعظم وفد جي آجيان ڪندي چيو ته پاڪستان مان دهشتگردي جو خاتمو سندس حڪومت جي اولين ترجيح آهي، اسان قومي اتفاق راءِ جوڙڻ کانپوءِ دهشتگردن جي خلاف فوجي آپريشن شروع ڪيو، جاري ضرب عضب آپريشن سڄي ملڪ مان دهشتگردي کي روڪڻ ۾ تمام ڪامياب رهي آهي، ان سان دهشتگردي جي نيٽ ورڪ کي تباهه ڪيو ويو جن بعد ۾ مايوسي ۾ آسان هدفن کي نشانو بڻائڻ شروع ڪري ڇڏيو.