اسلام آباد – 12 آگسٽ (اي پي پي) اسلامي جمهوريه پاڪستان جي صدر ڊاڪٽر عارف علوي عيدالاضحيٰ جي مبارڪ موقعي تي سڄي مسلمان قوم کي دلي مبارڪ باد پيش ڪندي دعا ڪئي آهي ته الله تعاليٰ اسان سڀني جي قربانين کي قبول فرمائي ۽ دنياوي ۽ آخرت جي نعمتن سان نوازي، هن چيو ته عيد الاضحيٰ جو ڏينهن ان عظيم قرباني جي ياد تازي ڪري ٿو جنهن ۾ حضرت ابراهيم عليه السلام الله تعاليٰ جي حڪم تي پنهنجي لخت جگر حضرت اسماعيل السلام کي الله جي راهه ۾ قرباني لاءِ پيش ڪري ڇڏيو هو، اهو عمل رب العزت جي بارگاهه ۾ ايترو مقبول ٿيو جو ان جي ياد ملهائڻ کي مسلمانن لاءِ عبادت جو درجو ڏنو ويو، اهو ڏينهن اسان کي سبق ڏي ٿو ته الله جي رضا ۽ خوشنودي لاءِ پنهنجي پيارين شين ايستائين جو اولاد کي به قربان ڪرڻو پئجي ته پاسو نه ڪيو وڃي.
