اسلام آباد – 08 آگسٽ (اي پي پي) پرڏيهي وزير شاهه محمود قريشي چيو آهي ته هندستان جي قدمن خلاف سلامتي ڪائونسل وڃڻ جو فيصلو ڪيو آهي، هندستان سڄي دنيا جو ڌيان ڪشمير تان هٽائڻ لاءِ ”پلواما ٽو“ طرز جو نئون ڊرامو رچائي سگهي ٿو، هندستان شمله معاهدي جي روح تي حملو ڪيو آهي جنهن ۾ ڪشمير مسئلي کي متازعه تسليم ڪيو ويو هو، هاڻي سڀني قانوني رُخن جو جائزو وٺنداسين، فيصلو ڪيو ويو آهي ته سمجهوتا ايڪسپريس پڻ نه هلندي، صورتحال تي چين سان مشاورت ضروري آهي، ان سلسلي ۾ جلد بيجنگ ويندس. جواهر لال نهرو پڻ چيو هو ته ڪشمير جو فيصلو ڪشميري عوام ڪندي، قومي سلامتي ڪميٽي جي فيصلن سان افغان واپار متاثر نه ٿيندو، ڀارت سڄي والاريل ڪشمير کي جيل ۾ تبديل ڪري ڇڏيو آهي، ڀارت ڪيستائين 40 لک ڪشميرين کي قيد رکندو. پرڏيهي وزارت ۾ والاريل ڪشمير جي صورتحال جي حوالي سان پريس ڪانفرنس ڪندي پرڏيهي وزير چيو ته منهنجي يورپي يونين جي اعليٰ نمائندن سان پرڏيهي معاملن بابت تفصيلي ڳالهه ٻولهه ٿي آهي.
