راولپنڊي– 29 اپريل (اي پي پي) پاڪ فوج جي ترجمان ميجر جنرل آصف غفور ڀارت کي خبردار ڪيو آهي ته جيڪي گجگوڙ ڪندا آهن اهي وسندا ناهن، ڀارت ڪجهه ڪرڻي چاهي ٿو ته پهرين پنهنجي جهازن جو ڪِرڻ ذهن ۾ رکي، هي نه 1971ع آهي ۽ نه اها فوج ۽ حالتون، صبر جو امتحان نه ورتو وڃي، اوهان چيو ايٽمي اثاثا ڏياري لاءِ نه آهن ته اچو اسان به تيار آهيون پاڪستان پنهنجي دفاع ۽ سلامتيءَ جي لاءِ هر صلاحيت کي ڪتب آڻيندو، ڀارت تي منحصر آهي ته اهو خطي ۾ امن ۽ سلامتي جي لاءِ ڳالهين جي ميز تي اچي ٿو يا 27 فيبروري کي ورجائڻ چاهي ٿو، پاڪ فوج جي ترجمان ميجر جنرل آصف غفور آءِ ايس پي آر ميڊيا کي بريفنگ دوران پاڪ- ڀارت ڇِڪتاڻ تي ڳالهائيندي چيو ته ان تي 22 فيبروريءَ تي ڳالهه ٻولهه ڪئي هئي، جڏهن انهن اسان مٿان پلواما جا الزام لڳايا هئا، مون ان وقت سببن جو ذڪر ڪيو هو ته پاڪستان ڪهڙيءَ ريت به ان حملي ۾ ملوث نه آهي.