اسلام آباد – 16 مئي (اي پي پي) اطلاعات ۽ نشريات واري وفاقي وزير سينيٽر پرويز رشيد چيو آهي ته وزيراعظم محمد نواز شريف جي سچ ڪوڙ کي ناڪ آئوٽ ڪري ڇڏيو آهي ۽ وزيراعظم جي سچ سان ناڪ آئوٽ ٿيندڙ واڪ آئوٽ ڪري ويا. اهڙن خيالن جو اظهار هن پارليامينٽ هائوس ٻاهران صحافين سان ڳالهائيدي ڪيو. هن چيو ته واڪ آئوٽ ڪندڙن وٽ چوڻ جي لاءِ ڪجهه هو ئي نه. وفاقي وزير وڌيڪ چيو ته وزيراعظم محمد نواز شريف اڳ ۾ به مخالف ڌر جي هر مطالبي کي مڃيو ۽ پارليامينٽ ۾ به اچي پاناما پيپرز جي حوالي سان ميڊيا ذريعي پنهنجي مٿان هنيل انهن سمورن الزامن جو نه رڳو جواب ڏنو پر جيڪو سچ هو اهو سڀ ٻڌائي ڇڏيو.
