شيخوپوره – 08 فيبروري (اي پي پي) وزيراعظم محمد نواز شريف چيو آهي ته هن سال 10 هزار ميگاواٽ بجلي نظام ۾ شامل، ايندڙ سال لوڊشيڊنگ مڪمل ختم ٿي ويندي، بجلي سستي به ڪنداسين، پهچ جو انتظام به ڪيو ويو آ هي، اسان محنت رنگ ڏيکاري رهي آهي، ثمر ملڻ جو وقت اچي رهيو آهي جنهن محنت ڪئي آهي اهو ئي وڃي ڦيٿو ڪاٽيندو. شيخوپوره ويجهو ڀکي پاور پلانٽ تي ڪم جي رفتار جو جائزو وٺڻ کانپوءِ تقريب کي خطاب ڪندي چئي. گئس سان هلندڙ هي بجلي گهر 1180 ميگاواٽ جي مجموعي پيداوار رکندڙ آهي ۽ 2018ع تائين مڪمل طور تي فعال ٿي ويندو. هي پلانٽ گرمين جي موسم کان اڳ شروعاتي طور تي 716 ميگاواٽ بجلي پيدا ڪرڻ شروع ڪري ڇڏيندو. سستي ۽ جديد ترين ٽربائن سان هلندڙ هن منصوبي تي 84 سيڪڙو ڪم مڪمل ٿي چڪو آهي. وزيراعظم محمد نواز شريف ڀکي پاور پلانٽ جي منصوبي جو ذڪر ڪندي چيو ته سوا سال اڳ آياسين ته هتي فصلن جي وچ ۾ بيٺل هئس الله تعاليٰ جي مدد سان اسان سوا سال ۾ ناممڪن کي ممڪن بڻائي ڇڏيو.
