اسلام آباد – 29 جنوري (اي پي پي) اطلاعات ۽ نشريات واري مملڪتي وزير مريم اورنگزيب چيو آهي ته عمران خان جي ملڪ کي ڏيوالپڻو چوڻ جون ڳالهيون ملڪ دشمني آهي، پوري دنيا جي نظر ۾ پاڪستان اڀري رهيو آهي ۽ عالمي ادارا به پاڪستان کي اسرندڙ معاشي قوت چئي رهيا آهن. پنهنجي هڪ بيان ۽ نجي ٽي وي چينل سان ڳالهائيندي هن چيو ته عمران خان جلد مستقل ويزا ذريعي پاڪستان کان ٻاهر وڃڻ وارو آهي. هن چيو ته عمران خان کي پنهنجي ملڪ جي قدر ڪڏهن ٿيندي، هاڻي چوي ٿو ته انگلستان کيس ڪرڪيٽر بڻايو، عمران خان کي شايد ان ڳالهه جو ڊپ آهي ته کيس ڪنهن ٻئي ملڪ جي ويزا نه ملندي. هن چيو ته ڪي پي ڪي جو صحت ۽ تعليم جو نظام ڪير ٺيڪ ڪندو، عمران خان ڪي پي ڪي جي احتساب ڪميشن کي تالو لڳرايو اتان جي انصاف جو نظام ڪير ٺيڪ ڪندو.
