گوادر – 13 نومبر (اي پي پي) وزيراعظم محمد نواز شريف چيو آهي ته گوادر تان پهرين ڪارگو جهاز جي رواني ٿيڻ سان پاڪ چين اقتصادي لنگهه (سي پيڪ) منصوبو حقيقت جو روپ اختيار ڪري ويو آهي. اهڙن خيالن جو اظهار وزيراعظم گوادر تان پهريون ميگا پائلٽ ٽريڊ ڪارگو روانو ٿيڻ واري تقريب کي خطاب ڪندي ڪيو. وزيراعظم چيو ته گوادر کان پهريون واپاري سامونڊي جهاز روانو ٿيڻ اهم سنگ ميل آهي، ان منصوبي سان پاڪستان ڏکڻ ايشيا، وچ ايشيا ۽ چين جي وچ ۾ اهم واپاري مرڪز بڻجي ويندو ۽ گوادر پڻ اقتصادي مرڪز بڻجندو پيو وڃي. هن چيو ته اڄ هڪ نئين دور جي شروعات ٿي آهي، ڪاشغر کان گوادر واپاري قافلي جي اچڻ سان نئين تاريخ لکجي آهي.
