نيويارڪ /لنڊن /برلن/ نئين دهلي/ ميڊرڊ – 01 فيبروري (اي پي پي) سڄي دنيا ۾ ڪورونا وائرس جي وبا سبب فوتگين جو انگ 22 لک 38 هزار تائين پهچي ويو. مختلف ملڪن ۾ موذي وائرس سبب متاثر ماڻهن جو انگ 10 ڪروڙ 35 لک کان وڌي ويو آهي. آمريڪي سڌ سماءَ جي ذريعن مطابق دنيا جي مختلف ملڪن ۾ ڪورونا وائرس جي متاثرن جو انگ 103528794 آهي، وائرس سبب متاثر ملڪن ۾ هاڻي تائين 2238190 ماڻهو فوت ٿي چڪا آهن. سڄي دنيا ۾ ڪووڊ – 19 جا فعال متاثرن جا انگ 26156276 آهي، ڪورونا جي وبا سان آمريڪا سڀني کان وڌيڪ متاثر ملڪ آهي، ملڪ ۾ ڪورونا وائرس سبب هيل تائين فوتگين جو انگ دنيا ۾ سڀني کان وڌيڪ آهي،برازيل ۾ ڪورونا وائرس سان ٿيڻ واري فوتگين جي لحاظ سان ٻِيو ۽ مريضن جي حوالي سان ٽيو نمبر تي آهي جڏهن ته ڀارت ڪورونا وائرس جي مريضن جو انگ جي اعتبار سان ٻيو ۽ فوتگين جي انگن اکرن مطابق ٽيو شديد متاثر ملڪ آهي. آمريڪا ۾ موذي ڪورونا وائرس جي وبا سبب فوتگين جو انگ چار لک 52 هزار کان وڌي ويو جڏهن ته سڄي ملڪ ۾ وائرس سبب متاثر ماڻهن جو انگ 2 ڪروڙ 67 لک کان وڌي ويو. ڀارت ۾ ڪورونا وائرس متاثرن جو انگ هڪ ڪروڙ 7 لک 58 هزار کان وڌي ويو آهي. جڏهن ته سڄي ملڪ ۾ فوتگين جو انگ هڪ لک 54 هزار 4 سئو کان وڌي ويو آهي.لاطيني آمريڪي ملڪ برازيل ۾ موذي ڪورونا وائرس سان فوتگين جو انگ 2 لک 24 هزار کان وڌي ويو آهي جڏهن ته سڄي ملڪ ۾ متاثرين جو انگ 92 لک تائين پهچي ويو آهي. برطانيه ۾ موذي ڪورونا وائرس سبب فوتگين جو انگ هڪ لک 4 هزار کان وڌي ويو. ملڪ ۾ وائرس سبب متاثر ماڻهن جو مجموعي انگ 38 لک 17 هزار ٿي ويو آهي. جرمني ۾ ڪورونا وائرس سان فوتگين جو انگ 57 هزار کان وڌي ويو آهي. جرمني ۾ ڪورونا وائرس سبب هيل تائين 22 لک 25 هزار ماڻهو متاثر ٿيا آهن. اسپين ۾ ڪورونا وائرس سان 58 هزار 3 سئو کان وڌيڪ ماڻهو فوت ٿي ويا آهن جڏهن ته ملڪ ۾ ڪورونا وائرس متاثرن جو مجموعي انگ 28 لک 30 هزار تائين پهچي ويو آهي.