مظفر آباد – 12 آگسٽ (اي پي پي) پرڏيهي وزير شاهه محمود قريشي چيو آهي ته وزيراعظم عمران خان 14 آگسٽ 2019ع جي آزادي جي ڏهاڙي جي موقعي تي آزاد ڪشمير جو دورو ڪندو ۽ اسيمبلي کي خطاب جي دوران ڪشمير مسئلي تي تفصيلي موقف پيش ڪندو، 14 آگسٽ تي اسلام آباد ۾ ريلي ڪڍي ويندي ۽ هڪ گڏيل مقصد لاءِ سڀني کي ان ۾ حصو ملائڻو پوندو، اسان جي سياسي پسند، ناپسند يا اختلاف ٿي سگهن ٿا ۽ ٿيڻ به گهرجن پر هن وقت اسان سڀني کي متفق ٿي آواز بلند ڪرڻ گهرجي، سفارتڪاري کي ترجيح ڏني ۽ فيصلو ڪيو ته اسان سفارتي، سياسي ۽ قانوني طور تي پنهنجو موقف اڳتي وڌائنداسين ڇو ته اسان سمجهون ٿا ته اهو هڪ مضبوط ڪيس آهي. سومر ڏينهن عيدالاضحيٰ جي موقعي تي والاريل ڪشمير جي پنهنجي ڀائرن سان يڪجهتي جو اظهار لاءِ پرڏيهي وزير آزاد ڪشمير جي گادي واري شهر مظفر آباد جو دورو ڪيو، ان موقعي تي هن مختلف تقريبن ۾ شرڪت ڪئي، پرڏيهي وزير شاهه محمود قريشي آزاد ڪشمير جي صدر سردار مسعود خان سان گڏ پريس ڪانفرنس ڪندي چيو ته جڏهن ڪشمير مان آواز اٿندو ته ان جو وزن وڌي ويندو، هن چيو ته وزيراعظم عمران خان 14 آگسٽ تي ڪشمير جي دوري دوران اسيمبلي کي خطاب ڪندو ۽ ڪشمير مسئلي جي حوالي سان پنهنجو تفصيلي موقف پيش ڪندو.
