اسلام آباد – 11 جولاءِ (اي پي پي) وزيراعظم عمران خان چيو آهي ته پاڪستان جي غريب ۽ لاچار طبقي کي ڇت جي فراهمي سندس خواب آهي، نئين پاڪستان هائوسنگ منصوبي تحت معاشري جي ڪمزور خاص طور تي ننڍي پگهاردار طبقي جي لاءِ پنهنجي ڇت جي فراهمي حڪومت جي ترجيحن ۾ شامل آهي، حڪومت نجي شعبي سان گڏجي شهرن جي ڪچي وستين جي رهواسين کي سهولتن سان گهرن جي فراهمي کي ممڪن بڻائيندي، گهرن جي تعمير لاءِ بئنڪن کان قرض حاصل ڪرڻ ۾ آسانيون فراهم ڪرڻ لاءِ قانون سازي سميت ٻيا قدم کنيا پيا وڃن. اهڙن خيالن جو اظهار هن اسلام آباد جي زون 4 ۾ نئين پاڪستان هائوسنگ اسڪيم تحت 18 هزار 500 گهرن جي تعمير جي منصوبي جو سنگ بنياد رکڻ جي تقريب کي خطاب ڪندي ڪيو.
