اسلام آباد – 25 مارچ (اي پي پي) وزيراعظم عمران خان مخالف ڌر پاران وفاقي گادي واري شهر طرف ملين مارچ جي ڪال کي رد ڪندي ان اعتماد جو اظهار ڪيو آهي ته پاڪستان جي عوام ڪجهه ڪرپٽ خاندانن کي بچائڻ جي لاءِ رستن تي نه نڪرندي. وزيراعظم آفيس ۾ ميڊيا جي نمائندن سان ڳالهائيندي هن چيو ته ڪنهن خاندان جي بدعنواني کي بچائڻ جي لاءِ دنيا ۾ ڪڏهن به ڪا عوامي تحريڪ ناهي ٿي، مخالف ڌر پاران ملين مارچ بابت سوال جو جواب ڏيندي هن چيو ته اسان ساڍا چار مهينا احتجاج ڪيو پر اهو مسئلن جي خلاف احتجاج هو جڏهن ته ٻئي طرف مخالف ڌر پنهنجي مني لانڊرنگ جي ڪيسن تي پڙدو وجهڻ چاهي ٿي ۽ ڪجهه علاج جي آڙ ۾ لڪڻ چاهين ٿا.