اسلام آباد – 05 جون (اي پي پي) نگران وفاقي ڪابينا حلف کڻي ورتو آهي. صدر ممنون حسين 6 نگران وزيرن کان سندن عهدي جو حلف ورتو. ان سلسلي ۾ تقريب ايوان صدر ۾ ٿي جنهن ۾ نگران وزيراعظم ناصر الملڪ به موجود هو. حلف کڻندڙ نگران وزيرن ۾ عبدالله حسين هارون، محمد اعظم خان، ڊاڪٽر شمشاد اختر، سيد علي ظفر، محمد يوسف شيخ ۽ مسز روشن خورشيد بروچه شامل آهن. تقريب جو باقاعده آغاز قرآن پاڪ جي تلاوت سان ٿيو، ان موقعي تي قومي ترانو وڄايو ويو، تقريب ۾ سينئر عملدارن شرڪت ڪئي. صدر ممنون حسين حلف برداري کانپوءِ نگران وزيرن کي مبارڪباد ڏيندي انهن لاءِ نيڪ خواهشن جو اظهار ڪيو.