اسلام آباد – 16 جنوري (اي پي پي) وزيراعظم شاهد خاقان عباسي چيو آهي ته عوام کي صحت، تعليم، روزگار جي موقعن جهڙين بنيادي سهولتن جي فراهمي حڪومت جي اولين ترجيح آهي. هن اها ڳالهه سنڌ مدرسته الاسلام يونيورسٽي، گورنمينٽ اسڪولز لوئر ٽوپه، لارنس ڪاليج، سلڪ حطار ۽ اسلام آباد ماڊل اسڪول سان تعلق رکندڙ شاگردن جي ٻن جدا جدا وفدن سان ڳالهائيندي چئي جن وزيراعظم آفيس ۾ ساڻس ملاقات ڪئي. وزيراعظم چيو ته تعليم معاشري جي ترقي جي لاءِ اهم هوندي آهي ۽ تعليم ذريعي ئي نوجوانن کي زندگي جي چئلينجن جو مقابلو ڪرڻ ۽ معاشري جي ترقي جي لاءِ پنهنجي صلاحيتن موجب ڪردار ادا ڪرڻ جي قابل بڻائي سگهجي ٿو. هي ملاقات نوجوانن سان وزيراعظم جي رابطا پروگرام جو حصو آهي جنهن تحت مختلف تعليمي ادارن جي شاگردن کي وزيراعظم آفيس گهرائي ملڪ جي اعليٰ آفيسن جي معاملن بابت آگاهي ڏني وڃي ٿي.
