وزيراعظم سان سٽيزن فائونڊيشن گڏاپ ۽ مهوش اينڊ جهانگير صديقي فائونڊيشن اسڪول ميرپورخاص جي شاگردن سان ڳالهه ٻولهه

اسلام آباد – 04 جنوري (اي پي پي) وزيراعظم شاهد خاقان عباسي شاگردن تي زور ڏنو ته هو سخت محنت ۽ پرعزم ڪوششن جي ذريعي تعليمي ميدان ۾ شاندار ڪارڪردگي جو مظاهرو ڪري ملڪ کي سمورن شعبن ۾ ڪاميابي جي رستي تي اڳتي وڌائين. هن اها ڳالهه سٽيزن فائونڊيشن گڏاپ ۽ مهوش اينڊ جهانگير صديقي فائونڊيشن اسڪول ميرپورخاص جي شاگردن ۽ شاگردياڻين سان ڳالهائيندي چئي جنهن وزيراعظم آفيس ۾ ساڻس ملاقات ڪئي. هي ملاقات ان سلسلي جي ڪڙي آهي جنهن ۾ ملڪ جي مختلف اسڪولن ۽ ڪاليجن کان آيل ٻارن ۽ شاگردن جي ملاقات اعليٰ حڪومتي عهديدارن سان ڪرائڻ سان گڏوگڏ انهن کي ملڪ جي پارلياماني نظام ۽ اعليٰ حڪومتي ۽ انتظامي معاملن جي حوالي سان آگاهي فراهم ڪئي ويندي آهي.