اسلام آباد – 10 نومبر (اي پي پي) وزيراعظم شاهد خاقان عباسي چيو آهي ته پاڪستان وٽ سائنس ۽ ٽيڪنالاجي جي شعبي ۾ دنيا کي پيش ڪرڻ جي لاءِ تمام گهڻو ڪجهه آهي، سائنس اقتصادي، سياسي ۽ سماجي واڌويجهه ۽ صلاحيت جي لاءِ بنيادي اهميت رکي ٿي جنهن کي نظرانداز نه ٿو ڪري سگهجي، قومي ترقي لاءِ حڪومت، نجي شعبي، اڪيڊميز ۽ دانشور گڏجي ڪم ڪن، تعليم ۽ سائنس جي شعبي تي ڌيان ڏئي پاڪستان تمام جلد دنيا جي ترقي يافته قومن ۾ پنهنجو جائز مقام حاصل ڪري سگهي ٿو. وزيراعظم امن ۽ ترقي 2017ع بابت سائنس جي عالمي ڏهاڙي جي موقعي تي پنهنجي پيغا۾ چئي ته سائنسي دريافت انساني ترقي ۽ خوشحالي جو هڪ بنيادي محرڪ رهي آهي ۽ اسان کي ان ڳالهه تي فخر آهي ته سائنسي تحقيق پسندي اسلامي دنيا جي ميراث رهي آهي، مسلمان دانشورن يورپ جي تاريخي دورن دوران پڻ سائنسي علم ۽ تحقيق جي جذبي کي زندهه رکيو.
