اسلام آباد – 21 نومبر (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته اهو ثابت ٿي ويو آهي ته سياسي پارٽين جا سربراهه اهي هوندا جن کي عوام ۽ سياسي پارٽيون نامزد ڪنديون، ڳڻپ جو راڳ آلاپڻ ۽ ڳڻپ ڪائونٽر هڻندڙن کي اڄ شڪست ٿي آهي، اڄ پاڪستان جي جمهوريت مستحڪم ٿي رهي آهي. پارليامينٽ هائوس ۾ قومي اسيمبلي مان پارٽي سربراهه جي حوالي سان پيپلزپارٽي جي پيش ڪيل آئيني بل جي رد ٿيڻ کانپوءِ صحافين سان ڳالهائيندي مريم اورنگزيب چيو ته اڄ پوري قوم مبارڪباد جي مستحق آهي، جيڪو قانون پارليامينٽ رد ڪيو ان مان اها ڳالهه ظاهر ٿي وئي ته ڪمزور ڪندڙ ڪاري قانون کي اڄ پارليامينٽ شڪست ڏئي ڇڏي آهي، اڄ جمهوريت جو دور آهي جنهن ۾ جمهوريت مستحڪم ٿي رهي آهي، محمد نواز شريف جي خلاف سازشون ڪندڙن کي اڄ شڪست ٿي.
