اسلام آباد – 08 آگسٽ (اي پي پي) وزيراعظم شاهد خاقان عباسي چيو آهي ته وزارت عظميٰ جي لاءِ منهنجو نالو محمد نواز شريف تجويز ڪيو ۽ ان جي سڀني تائيد ڪئي، آئون 45 ڏينهن وزيراعظم رهان يا 10 مهينا، ان جو فيصلو پارٽي ڪندي، مسلم ليگ (ن) جي حڪومت جيترا ترقياتي ڪم ڪرايا ماضي ۾ ان جو مثال نه ٿو ملي. نجي ٽي وي چينل سان ڳالهائيندي وزيراعظم شاهد خاقان عباسي چيو ته سمورن ملڪن سان لاڳاپا بهتر بڻائڻ اسان جو هدف آهي، خواجه محمد آصف ڪامياب ترين پرڏيهي وزير ثابت ٿيندو، سفارتي معاملن جي لاءِ محمد نواز شريف کان بهتر ڪو شخص نه ڏٺو، چين سان تازن لاڳاپن جو تاريخ ۾ مثال نه ٿو ملي، روس سان لاڳاپن جي بحالي اهم ڪاميابي آهي، ڀارت سان لاڳاپن کي بهتر بڻائڻ ملڪ جي مفاد ۾ آهي.