اسلام آباد – پهرين مئي (اي پي پي) صدر ممنون حسين چيو آهي ته ملڪ جي اقتصادي ترقي ۽ خوشحالي اسان جي پورهيتن ۽ هنرمندن جي اڻٿڪ ڪوششن کانسواءِ ممڪن نه آهي، مون کي يقين آهي ته سمورين ڌرين جي تعاون ۽ مدد سان اسان پنهنجي پورهيتن جي لاءِ بهتر معيار زندگي حاصل ڪري سگهون ٿا ۽ انهن جي لاءِ ترقي جي برابر موقعن ۽ حقن جي فراهمي کي يقيني بڻائي سگهون ٿا، شڪاگو جي شهيدن ڏاڍ، استحصال ۽ ناانصافي خلاف جدوجهد ۾ قربانيون ڏنيون. صدر اهڙن خيالن جو اظهار مزدورن جي عالمي ڏهاڙي جي موقعي تي قوم جي نالي پنهنجي خصوصي پيغام ۾ ڪيو آهي. صدر چيو ته مزدورن جو عالمي ڏهاڙو هڪ اهڙو موقعو آهي جنهن تي اسان ڪم ڪندڙ مرد ۽ عورتن جي خدمتن کي ساراهيون ٿا جيڪي ملڪ جو هڪ اهم ٿنڀ آهن، هي ڏينهن شڪاگو جي شهيدن جي ياد تازي ڪري ٿو جن ڏاڍ، استحصال ۽ ناانصافي خلاف جدوجهد ۾ قربانيون ڏنيون.