رسالپور – 11 اپريل (اي پي پي) وزيراعظم محمد نواز شريف چيو آهي ته پاڪستان جي باني قائداعظم محمد علي جناح جي ويزن موجب گڏيل خوشحالي اسان جو مشن آهي، پاڪستان خطي ۽ پاڙيسري ملڪن سان بهتر لاڳاپا چاهي ٿو، پاڪستان هڪ پرامن ملڪ آهي ۽ پاڪستان جو مضبوط دفاع اسان جو عزم آهي. پي اي ايف اصغر خان اڪيڊمي رسالپور ۾ ڪيڊٽس جي گريجوئيٽس پاسنگ آئوٽ جي تقريب جي موقعي تي خطاب ڪندي وزيراعظم محمد نواز شريف چيو ته پي اي ايف اڪيڊمي مان تربيت ماڻيندڙ ڪيڊٽس مبارڪباد جا مستحق آهن ۽ اڄ جو ڏينهن انهن جي لاءِ خصوصي اهميت وارو آهي. هن چيو ته گريجوئيشن مڪمل ڪندڙ ڪيڊٽس اڄ جي تقريب کي ڪڏهن به نه ٿا وساري سگهن ۽ اهو لمحو سندن زندگي ۾ ٻيهر نه ايندو. هن چيو ته اسان کي سخت محنت جاري رکڻ گهرجي ۽ اسان جي ڪاميابين ۾ سخت محنت جو ثمر شامل آهي.
