اسلام آباد – 28 اپريل (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته وزيراعظم محمد نواز شريف جي ويزن موجب حڪومت ورڪنگ جرنلسٽن جي حقن جي تحفظ ۽ سيڪيورٽي يقيني بڻائيندي، موجوده جمهوري حڪومت اظهار جي آزادي تي پورو يقين رکي ٿي. هو اٺين ويج بورڊ جي جوڙجڪ بابت اعليٰ سطحي اجلاس جي صدارت ڪري رهي هئي. اجلاس ۾ ويج بورڊ جي جوڙجڪ جي حوالي سان مختلف معاملن ۽ رخن جو جائزو ورتو ويو. اجلاس ۾ فيصلو ڪيو ويو ته اطلاعات واري وزارت ان ڏس ۾ قانون ۽ انصاف ڊويزن جي ماهراڻي قانوني راءِ ورتي ويندي ۽ اٺين ويج بورڊ جي جوڙجڪ لاءِ اطلاعات ۽ نشريات واري وزارت سمورن اسٽيڪ هولڊرز سان مشاورت به ڪندي.
