اسلام آباد – 20 اپريل (اي پي پي) سپريم ڪورٽ پاناما پيپرز ڪيس جو محفوظ ڪيل فيصلو ٻڌائيندي پاناما پيپرز ۾ لڳايل الزامن جي تفصيلي جاچ لاءِ گڏيل تحقيقاتي ٽيم (جي آءِ ٽي) جوڙڻ ۽ ان کي 60 ڏينهن جي اندر پنهنجي رپورٽ پيش ڪرڻ جو حڪم ڏنو آهي، پاناما پيپرز ڪيس جي شنوائي ڪندڙ 5 رڪني لارجر بينچ جي سربراهه جسٽس آصف سعيد کوسه خميس ڏينهن محفوظ ڪيل فيصلو ٻڌايو، جسٽس آصف سعيد کوسه جي سربراهي ۾ جسٽس اعجاز افضل خان، جسٽس گلزار احمد، جسٽس شيخ عظمت سعيد ۽ جسٽس اعجاز الاحسن تي ٻڌل سپريم ڪورٽ جي پنج رڪني لارجر بينڪ ڌرين جي وڪيلن جا دليل مڪمل ٿيڻ کان پوءِ 23 فيبروري تي پاناما دستاويزن واري ڪيس جو فيصلو محفوظ ڪيو هو، جسٽس آصف سعيد کوسه عدالت ۾ اڪثريتي فيصلو پڙهي ٻڌايو، جنهن ۾ هن پاڻ ۽ جسٽس گلزار احمد اعليٰ عدالت جي ٻين ٽن ججن سان اختلاف رکيو.
