اسلام آباد – 18 مارچ (اي پي پي) پرڏيهي صلاحڪار سرتاج عزيز دولت مشترڪه جي بنيادي قدرن کي اجاگر ڪرڻ ۾ ايڪشن گروپ جي ڪردار کي ساراهيندي چيو آهي ته پاڪستان امن، ترقي ۽ جمهوريت جي فروغ ۾ دولت مشترڪه ۽ ان سان لاڳاپيل تنظيمن جي ڪردار کي وڏي اهميت ڏئي ٿو. لنڊن مان مليل هڪ پيغام ۾ پرڏيهي معاملن جي باري ۾ وزيراعظم جي صلاحڪار اها ڳالهه لنڊن ۾ دولت مشترڪه وزارتي ايڪشن گروپ جي 50 هين اجلاس کي خطاب ڪندي چئي. هن دولت مشترڪه سيڪريٽريٽ ۽ ميمبر ملڪن جي وچ ۾ مسلسل رابطن جي اهميت تي زور ڏنو، برطانيه ۾ پاڪستان جي هاءِ ڪمشنر سيد ابن عباس به پرڏيهي صلاحڪار سان گڏ هو، قبرص جي پرڏيهي وزير جي صدارت ۾ ٿيندڙ اجلاس ۾ دولت مشترڪه جي مختلف ميمبر ملڪن جي پرڏيهي وزيرن ۽ صلاحڪارن شرڪت ڪئي.
