حيدرآباد – 27 مارچ (اي پي پي) مسلم ليگ (ن) جي سينيٽر ڊاڪٽر راحيلا مگسي چيو آهي ته وزيراعظم محمد نواز شريف حيدرآباد جي پريشان عوام جي لاءِ مسيحا بڻجي آيو آهي، وزيراعظم عظيم شخص آهي جنهن جي دل ۾ غريبن جي لاءِ درد ۽ همدردي جو جذبو موجود آهي، حيدرآباد جي عوام 2018ع جي چونڊن ۾ مسلم ليگ (ن) جي ڀرپور حمايت ڪندي ۽ وزيراعظم جي قيادت ۾ ملڪ کي وڌيڪ ترقي جي راهه تي گامزن ڪرڻ ۾ سندس ساٿ ڏيندي. سينيٽر ڊاڪٽر راحيلا مگسي حيدرآباد ۾ مسلم ليگ (ن) جي ورڪرز ڪنوينشن کي خطاب ڪري رهي هئي. هن وزيراعظم محمد نواز شريف کان حيدرآباد جي عوام پاران مطالبو ڪيو ته 40 لک آبادي تي ٻڌل شهر ۾ يونيورسٽي قائم ڪئي وڃي.