اسلام آباد – 30 مارچ (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته پاڪستان مسلم ليگ (ن) دهشتگردي جي لعنت ۽ توانائي جي کوٽ جهڙن چئلينجن تي ضابطو آڻڻ سان گڏوگڏ پائيدار اقتصادي واڌويجهه حاصل ڪرڻ جا واعدا پورا ڪيا آهن. ايسوسيئيٽيڊ پريس آف پاڪستان (اي پي پي) جي هيڊڪوارٽرز جي دوري جي موقعي تي اي پي پي کي خصوصي انٽرويو ۾ هن چيو ته پاڪستان مسلم ليگ (ن) جي حڪومت ٻين پارٽين جي پاليسين جو مقابلو پنهنجي ڪارڪردگي سان ڪري رهي آهي جنهن جي نتيجي ۾ پاڪستان بدلجي رهيو آهي ۽ هتي استحڪام اچي رهيو آهي. هن چيو ته هاڻي سياست ۽ ڪارڪردگي هڪ ٻئي سان ڳنڍيل آهن ۽ عوام پارٽين کي ڪارڪردگي جي بنياد تي ووٽ ڏيندي.
