ڪراچي – 03 فيبروري (اي پي پي) وزيراعظم محمد نواز شريف چيو آهي ته چارٽرڊ جهازن تي سفر ڪندڙن کي روڊن جي اهميت جو اندازو ناهي، ميٽرو بس کي جنگلا بس چوندڙن کي عوام جي ضرورتن جو خيال ڪونهي ڪو، قومي روڊن ۽ موٽر ويز اهي شريانيون آهن جن ۾ معيشت جو رت گردش ڪندو آهي. 75 ڪلوميٽر ڪراچي – حيدرآباد موٽر وي جي تعمير ٿيل سيڪشن جي افتتاح ڪرڻ واري موقعي تي خطاب ڪندي هن چيو ته ڪراچي کان پشاور تائين خوبصورت ميٽرو موٽر وي ۽ روڊن جو ڄار وڇايو ويندو، وزيراعظم چيو ته روڊن جي اهميت کي سمجهڻ لاءِ عوام سان تعلق ضروري آهي، 1990ع جو تسلسل برقرار رهي ها ته ملڪ جي ڪنڊ ڪڙڇ تي موٽر ويز هجي ها، هن چيو ته موجوده حڪومت انفرااسٽرڪچر سميت تعليم، صحت ۽ بنيادي زندگي جي ضرورتن جي فراهمي تي ڌيان ڏئي رهي آهي، وزيراعظم چيو ته جن ملڪن ترقي ڪئي انهن سڀني کان پهرين انفرااسٽرڪچر تي ڌيان ڏنو.
