اسلام آباد – 08 فيبروري (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته پاڪستان، ڀارت جي مخالفاڻي ۽ غيرذميواراڻي رويي جي باوجود سنڌ طاس معاهدي جي معاملي تي ذميوار رياست هجڻ جو مظاهرو ڪري رهيو آهي. مقامي هوٽل ۾ پاڪستان ۾ پاڻي تحفظ جي چئلينج تي مشاورتي ورڪشاپ کي خطاب ڪري رهي هئي. هن چيو ته حڪومت سنڌ طاس معاهدي جي حوالي سان درپيش چئلينجن کي منهن ڏيڻ جي لاءِ ٺوس حڪمت عملي ٺاهي رهي آهي. هن چيو ته ڀارت ان معاهدي تي شايد ڪنهن غلط فهمي جو شڪار آهي، ان معاهدي جي خلاف ورزي تي ڀارت کي پاڻ نقصان ٿيندو. هن چيو ته ان معاملي کي حل ڪرڻ جي لاءِ پاڪستان هر قسم جي صلاحيت رکي ٿو، ڀارت کي به گهرجي ته ان اهم معاملي تي سياست بدران ڳالهين جو حصو بڻجي.