اسلام آباد – پهرين نومبر (اي پي پي) سپريم ڪورٽ پاناما ليڪس جي معاملي تي جوڊيشل ڪميشن ٺاهڻ جو فيصلو ڪندي سمورين ڌرين کي خميس تائين ٽي او آرز جمع ڪرائڻ جي هدايت ڪئي آهي. چيف جسٽس انور ظهير جمالي جي سربراهي ۾ جسٽس آصف سعيد کوسا، جسٽس اميرهاني مسلم، جسٽس شيخ عظمت سعيد ۽ جسٽس اعجازالحق تي ٻڌل 5 رڪني لارجر بئنچ تحريڪ انصاف، جماعت اسلامي، عوامي مسلم ليگ، جمهوري وطن پارٽي ۽ طارق اسد ايڊووڪيٽ پاران داخل درخواستن جي ٻڌڻي ڪئي. ٻڌڻي دوران پي ٽي آءِ جو سربراهه عمران خان عدالت ۾ پيش نه ٿيو جڏهن ته شاهه محمود قريشي، نعيم الحق، حامد خان ۽ پي ٽي آءِ جا وڪيل عدالت ۾ موجود رهيا.
