اسلام آباد – پهرين نومبر (اي پي پي) صدر ممنون حسين چيو آهي ته آبادگارن جي مسئلن جو حل حڪومت جي اولين ترجيح آهي، ڪپهه پيدا ڪندڙ ملڪ ڪپهه جي پيداوار وڌائڻ ۽ ان جي مسئلن جي حل لاءِ گڏيل حڪمت عملي طئي ڪن ته جيئن صنعتي پيداوار ۾ اضافو ٿئي ۽ ملڪي معيشت به مضبوط ٿئي. صدر ممنون حسين اها ڳالهه ايوان صدر ۾ انٽرنيشنل ڪاٽن ايڊوائيزري ڪميٽي (آءِ سي اي سي) جي ميمبرن جي مان ۾ ڏنل آجياڻي کي خطاب دوران چئي جنهن ۾ ملڪي ۽ پرڏيهي نمائندن جي هڪ وڏي انگ شرڪت ڪئي. هن چيو ته آبادگارن کي زراعت جي شعبي بابت ٿيندڙ جديد کوجنا مان ڀرپور فائدو کڻڻ گهرجي ته جيئن پيداوار ۾ وڌ کان وڌ اضافو ٿئي. ان سان نه رڳو ملڪي مٽاسٽا جي ناڻي ۾ پڻ اضافو ٿيندو پر آبادگارن جي پنهنجي حالت به بهتر ٿي سگهندي.