گڏيل قومون – 21 سيپٽمبر (اي پي پي) وزيراعظم محمد نواز شريف گڏيل قومن ۾ ڪشمير ۾ ڀارتي بربريت کي وائکو ڪندي والاريل ڪشمير ۾ ڀارت پاران ڪشميرين جي شهادت ۽ بربريت جو پتو لڳائڻ لاءِ گڏيل قومن کان فيڪٽ فائنڊنگ مشن موڪلڻ ۽ انڪوائري ڪرڻ جو مطالبو ڪندي چيو آهي ته گڏيل قومون ڪشمير مسئلي جي حل لاءِ ڪردار ادا ڪري. گڏيل قومن جي جنرل اسيمبلي کي خطاب ڪندي وزيراعظم نواز شريف چيو ته فوجي طاقت جي استعمال سان افغانستان جو مسئلو حل نه ٿو ٿي سگهي، افغانستان ۾ 35 سالن کان گهرو ويڙهه جا پاڪستان تي به اثر پيا آهن، پاڪستان ڀارت سان امن چاهي ٿو، ڀارت ڳالهين جي لاءِ اڳواٽ شرطون رکيون، پاڪستان ۽ ڀارت جون ڳالهيون ٻنهي ملڪن جي مفاد ۾ آهن، ڪشمير جي مسئلي کي حل ڪرڻ کانسواءِ پاڪستان ۽ ڀارت ۾ امن قائم نه ٿو ٿي سگهي، ڪشميرين جي نئين نسل ڀارتي قبضي خلاف اٿي بيٺي آهي.
