اسلام آباد – 04 آگسٽ (اي پي پي) وزيراعظم محمد نواز شريف چيو آهي ته پاڪستان کي اڄ هڪ محفوظ تر ۽ مستحڪم پاڪستان طور ڏٺو پيو وڃي، جڏهن ته پاڪستاني قوم پنهنجي بي پناهه صلاحيتن کي استعمال ۾ آڻيندي سڄي اسلامي دنيا ۾ باوقار مقام حاصل ڪرڻ جي راهه تي گامزن آهي، هن اها ڳالهه پوليس جي شهيدن جي ڏهاڙي جي موقعي تي پنهنجي پيغام ۾ چئي. وزيراعظم چيو ته دهشتگردي جي خلاف جنگ اسان جو نه جهڪندڙ قومي عزم آهي، جيڪو پنهنجي سرزمين تان دهشتگردي ۽ انتهاپسندي جي لعنت کي پاڙ کان پٽي اڇلائڻ جو حامل آهي.
