لاهور / اسلام آباد – 12 جولاءِ (اي پي پي) وزيراعظم محمد نواز شريف چيو آهي ته هو پاڪ چين اقتصادي لنگهه منصوبي جي اڳڀرائي جو ذاتي طور تي جائزو وٺي رهيو آهيو آهي جيڪو خطي ۾ ڪروڙين ماڻهن جي زندگين ۾ تبديلي آڻيندو. رائيونڊ ۾ پنهنجي رهائشگاهه تي وارد ٽيلي ڪام انٽرنيشنل جي چيئرمين ۽ ابوظهبي گروپ يونين نيشنل بئنڪ ۽ يونائيٽيڊ بئنڪ لميٽيڊ جي چيئرمين شيخ نيهان بن مبارڪ النهيان جي سربراهي تي ٻڌل هڪ وفد سان ڳالهائيندي وزيراعظم چيو ته 46 ارب ڊالر جو منصوبو رستن جي نيٽ ورڪ ۽ ريلوي نظام جي تعمير سان پوري خطي کي ڳنڍيندو. هن چيو ته منهنجي حڪومت پائيدار امن، مستحڪم معاشي ترقي ۽ ٺوس انفرااسٽرڪچر ڊولپمينٽ حاصل ڪرڻ لاءِ ملڪ کي صحيح رخ تي آندو آهي. هن ملڪ مان دهشتگردن جي خاتمي لاءِ آپريشن ضرب عضب جي ڪاميابي تي اطمينان جو اظهار ڪيو ۽ چيو ته حڪومت صنعتي شعبي کي بجلي جي بنا رڪاوٽ فراهمي کي يقيني بڻايو آهي ۽ 2018ع تائين ملڪ مان توانائي جي کوٽ تي ضابطو آندو ويندو.
