اسلام آباد – 30 جون (اي پي پي) پاڪ چين اقتصادي راهداري بابت پارلياماني ڪميٽي کي ٻڌايو ويو آهي ته گوادر ۾ عالمي معيار جي ايئرپورٽ جي تعمير 26 ڪروڙ ڊالر سان مڪمل ٿيندي، هي رقم چين فراهم ڪندو، 2017ع جي آخر تائين ايران کان گوادر لاءِ 100 ميگاواٽ اضافي بجلي دستياب هوندي، 21 کان 23 جولاءِ تائين ڪميٽي پنجاب حڪومت کان سي پيڪ منصوبي جي حوالي سان خيالن جي ڏي وٺ ڪندي. ڪميٽي جو اجلاس چيئرمين مشاهد حسين سيد جي صدارت ۾ منعقد ٿيو، اجلاس دوران ڪميٽي جي چيئرمين 21 کان 27 مئي 2016ع جي دوران چين جي دوري جي باري ۾ آگاهه ڪيو، ميمبرن چيني حڪومت طرفان پارلياماني ڪميٽي کي گهرائڻ تي ان جو ٿورو ادا ڪيو، ڪميٽي دوري جي دوران ڪميٽي جي مثبت ڪم جي به واکاڻ ڪئي.
