وزيراعظم جي جهاز مان – 12 مئي (اي پي پي) وزيراعظم محمد نواز شريف چيو آهي ته ان پاران چيف جسٽس کي پاناما دستاويزن جي معاملي جي ڇنڊڇاڻ لاءِ ڪميشن جوڙڻ جي لاءِ خط کانپوءِ مخالف ڌر جو موجوده رويو بنا جواز آهي. هن اها ڳالهه تاجڪستان جي دوري تان وطن واپس ايندي صحافين سان ڳالهائيندي چئي جتي هن ڪاسا 1000 منصوبي جي افتتاحي تقريب ۾ شرڪت ڪئي. وزيراعظم چيو ته هو پاناما ليڪس بابت عدالتي ڪميشن جوڙڻ جو سچي نيت سان انتظار ڪري رهيو آهي ته جيئن قوم آڏو تصوير واضح ٿي سگهي، ڪو شخص پاڻ ڪميشن ٺاهڻ جي ڪوشش نه ڪري.
