اسلام آباد – 24 مئي (اي پي پي) منصوبابندي، ترقي ۽ سڌارن واري وفاقي وزير احسن اقبال چيو آهي ته موجوده حڪومت پاڪ چين سفارتي لاڳاپن کي اقتصادي لاڳاپن ۾ تبديل ڪري ڇڏيو آهي، چين پاڪستان اقتصادي لنگهه منصوبو 65 سالن جي تاريخ جو سڀ کان وڏو منصوبو آهي، چين پاڪستان ۾ سيڙپڪاري ڪندڙ سڀ کان وڏو ملڪ بڻجي چڪو آهي. هو پاڪستان براڊ ڪاسٽنگ ڪارپوريشن اسلام آباد ۾ ”پاڪ چين آئرن برادرز“ جي موضوع تي هڪ سيمينار کي خطاب ڪري رهيو هو. وفاقي وزير چيو ته پاڪستان ۽ چين جي دوستي نفعي ۽ نقصان کان مٿانهين آهي. چين جي معيشت سان سڄي دنيا فائدو کڻي رهي آهي.