اسلام آباد – 23 مئي (اي پي پي) صدر ممنون حسين چيو آهي ته قبائلي علائقن جي ٽن ايجنسين جي بي گهر ماڻهن جي پنهنجي گهرن ڏانهن واپسي مڪمل ٿي چڪي آهي جڏهن ته ٻين ٽن ايجنسين جي ماڻهن جي واپسي جلد مڪمل ٿي ويندي. صدر اها ڳالهه فاٽا جي صلاحڪارن سان ايوان صدر ۾ ملاقات دوران چئي. ان موقعي تي سينيٽر مشاهد الله خان سميت ستن قبائلي ايجنسين سان تعلق رکندڙ صلاحڪار پڻ موجود هئا. صدر چيو ته بي گهر ماڻهن جي ٻيهر آبادڪاري جي لاءِ حڪومت وڏي رقم مخصوص ڪئي آهي. هن چيو ته آپريشن ضرب عضب جا مثبت نتيجا سامهون آيا آهن ۽ فاٽا جي ستن ايجنسين ۾ حالتون معمول تي اچي رهيون آهن.
