اسلام آباد – 23 مئي (اي پي پي) وزيراعظم جي پرڏيهي معاملن واري خصوصي صلاحڪار طارق فاطمي چيو آهي ته اقتصادي لنگهه جي شڪل ۾ وزيراعظم نواز شريف ۽ سندس چيني هم منصب جو ويزن اڄ عملي طور تي قوم آڏو آهي، تاريخ ۾ چين جي ترقي جو مثال نه ٿو ملي ۽ ڪنهن ملڪ جي ترقي جي ايتري اعليٰ رفتار ايتري عرصي تائين برقرار ناهي رهي. اهڙن خيالن جو اظهار هن پلاننگ ڪميشن ۾ پاڪستان ۽ چين جي سفارتي لاڳاپن جي سالگرهه واري تقريب کي خطاب ڪندي ڪيو. طارق فاطمي چيو ته پاڪ چين اقتصادي لنگهه رڳو لنگهه نه پر ٻنهي وزيراعظمن جو ويزن آهي، ان منصوبي سان خطي ۾ امن ۽ استحڪام ۽ روزگار ممڪن ٿيندو. ان منصوبي جي رستي ۾ ڪيترائي چئلينجز آهن پر ٻنهي ملڪن جي عوام جي تعاون سان اهو منصوبو پڄاڻي تي پهچندو.
