پاڪستان جلد اقتصادي سرگرمين جو محور بڻجي ويندو: وزيراعظم

ڪولمبو – 06 جنوري (اي پي پي) وزيراعظم محمد نواز شريف سريلنڪا جي ڪاروباري شخصيتن کي پاڪستان ۾ خاص طور تي توانائي ۽ بنيادي ڍانچي جي شعبن ۾ سيڙپڪاري جي موقعن جو جائزو وٺڻ جي دعوت ڏيندي چيو آهي ته پاڪستان ۾ سيڙپڪاري لاءِ دوستاڻي ماحول ان کي سيڙپڪاري جي لاءِ نهايت پرڪشش مقام بڻائي ڇڏيو آهي. هن اها ڳالهه سريلنڪا جي صنعتن جي سربراهن، اعليٰ انتظامي عهديدارن ۽ ميڊيا جي سربراهن سان ملاقات دوران چئي ۽ ساڻن هڪٻئي جي ملڪن ۾ سيڙپڪاري جي امڪانن تي خيالن جي ڏي وٺ ڪئي. وزيراعظم چيو ته پاڪستان معيشت جي استحڪام ۽ ملڪ ۾ امن کي يقيني بڻائڻ جي لاءِ موجوده حڪومت طرفان کنيل قدمن کانپوءِ خوشحالي جي سفر تي گامزن آهي .