رياض- 21 اپريل (اي پي پي)خادم الحرمين الشريفين شاهه سلمان بن عبدالعزيز سعودي عوام، اتي رهندڙ پرڏيهين ۽ مسلمان امت کي عيد الفطر جون مبارڪون ڏيندي چيو آهي ته خواهش آهي ته عيد جو ڏينهن پاڻ سان گڏ خطي ۾ امن ۽ استحڪام ۽ سڪون ۽ اطمينان جي خوشخبري آڻي. سعودي خابرو اداري موجب شاهه سلمان پنهنجي عيد واري پيغام ۾ ان خوشي جو اظهار ڪيو ته عيد جو تهوار پاڻ سان گڏ خطي ۾ امن ۽ استحڪام ۽ سڪون ۽ اطمينان جي خوشخبري آڻي، اسان کي عيدالفطر جي مبارڪ ڏيندي خوشي محسوس ٿي رهي آهي. هن چيو ته الله تعاليٰ اسان سڀني جا روزا، تراويح، تهجد ۽ ٻيا سٺا ڪم قبول فرمائي ۽ بار بار اسان کي هي تهوار ملهائڻ نصيب ڪري، اسان جي ملڪ ۽ سڄي دنيا جي ملڪن تي امن ۽ سلامتي ۽ اطمينان ۽ سڪون جو ماحول هجي. شاهه سلمان چيو ته الله تعاليٰ پنهنجي فضل ۽ ڪرم سان اسان کي منفرد اعزاز عطا ڪيو، حرمين شريفين جي خدمت ۽ حج ۽ عمري زائرين جي آرام ۽ راحت جي انتظامن جو فرض بخشيو آهي، هي اهڙو اعزاز آهي جنهن سان الله تعاليٰ صرف اسان کي نوازيو آهي. هن چيو ته مقدس فرض جو احساس ۽ پاڪيزه ذميواري جي ادائيگي وڏي فخر جي ڳالهه آهي، مملڪت جي باني جي هٿان سعودي رياست جي قيام کان وٺي هن وقت تائين ان فرض جي ادائيگي ۾ اسان ڏينهن رات هڪ ڪيو آهي ۽ تن من ڌن سان ان ذميواري جي ادائيگي ۾ لڳل آهيون. سندس چوڻ هو ته باني مملڪت جي فرزند حڪمران ان ذميواري کي پابندي سان ادا ڪرڻ پنهنجي لاءِ فخر ۽ ناز جو سبب سمجهن ٿا، سدائين پنهنجي ان عهد ۽ عزم تي قائم رهندا. شاهه سلمان چيو ته الله تعاليٰ جي بي شمار نعمتن مان هڪ هي به آهي ته هُن هن سال رمضان المبارڪ دوران لکين زائرين کي عمرو ادا ڪرڻ جي آساني عطا ڪئي، الله تعاليٰ کان دعاڳو آهيون ته هو زائرين کان عمري ۽ اسان طرفان ان جي خدمت قبول فرمائي، هي سڀ ڪجهه الله تعاليٰ جي فضل ۽ ڪرم ۽ رياستي ادارن طرفان زائرين جي مسلسل خدمت جي وجهه سان ممڪن ٿي سگهي ٿو، زائرين کي عبادت جي ادائيگي ۾ هر ممڪن سهولت ڏي، هن چيو ته عيدالفطر جي اهم ڳالهه اها آهي ته هن موقعي تي خوشي، ميل ميلاپ، رواداري ۽ ضرورتمندن جي ضرورتن جي تڪميل ۾ دلچسپي ورتي ويندي آهي، الله تعاليٰ اسان سڀني جون خوشيون قائم ۽ دائم رکي، دعا آهي ته الله تعاليٰ عيد سان گڏ اسان جي علائقي ۾ نه پر سڄي دنيا جي ملڪن ۾ امن ۽ استحڪام ۽ اطمينان ۽ سڪون جو خوشخبريون آڻي.
