اسلام آباد – 14 – سيپٽمبر (اي پي پي) اطلاعات ۽ نشريات واري مملڪتي وزير فرخ حبيب چيو آهي ته خوراڪ ۽ زراعت جي عالمي اداري موجب فيبروري 2020ع کان آگسٽ 2021ع تائين کاڌي پيتي جي شين جي قيمتن ۾ عالمي سطح تي 27 سيڪڙو اضافو ٿيو آهي جيڪو ڪورونا وائرس جي عالمگير وبا، پيداوار ۾ کوٽ، لاجسٽڪ ڪاسٽ ۾ اضافي جو نتيجو آهي ان جي باوجود بهتر حڪومتي پاليسين جي ڪري مهانگائي جي عالمي سطح تي شرح جو مڪمل اثر منتقل نه ٿيڻ ڏنو ويو پر پي ڊي ايم جي اکين تي اين آر او جي پٽي ٻڌل آهي، هنن آئون نه مڃان جي رٽ لڳائي رکي آهي، ن ليگ، پيپلزپارٽي پنهنجي دورن ۾ پيداوار وڌائڻ بدران مني لانڊرنگ، جعلي اڪائونٽس ۽ ڪرپشن تي ڌيان ڏنو. پي آءِ ڊي ۾ پريس ڪانفرنس کي خطاب ڪندي مملڪتي وزير فرخ حبيب چيو ته 2008ع کان 2018ع تائين عالمي سطح تي جنسن جي قيمتن ۾ اضافو ناهي ٿيو، ان کانپوءِ ڪووڊ – 19، پيداوار ۾ گهٽتائي، لاجسٽڪ ڪاسٽ ۾ اضافي سبب قيمتن ۾ اضافو ٿيو آهي. گڏيل قومن خوراڪ ۽ زراعت واري جي اداري (يو اين ايف اي او) جي رپورٽ موجب فيبروري 2020ع کان آگسٽ 2021ع تائين کاڌي پيتي جي شين جي قيمتن ۾ عالمي سطح تي 127 سيڪڙو اضافو ٿيو آهي، کاڌي پيتي جي شين ۾ اهو اضافو 10 سالن ۾ سڀ کان وڌيڪ آهي، پاڪستان 7 سيڪڙو دالين ۽ کاڄرو تيل درآمد ڪندو آهي، ان جي باوجود بهتر حڪومتي پاليسين جي ڪري مهانگائي جي عالمي سطح جي شرح جو مڪمل اثر منتقل نه ٿيڻ ڏنو، هن چيو ته حڪومت غذائي تحفظ تي ڪم ڪري رهي آهي، ماضي ۾ ن ليگ ڪاٽن ايريا ۾ شوگر ملون لڳايون ۽ اتي ڪمند جي پوک شروع ٿي وئي، مملڪتي وزير فرخ حبيب چيو ته گهٽ آمدني ۽ وچولي طبقي لاءِ 1000 ارب جي رهائشي ۽ ڪمرشل منصوبا منظور ٿيا جنهن جو معاشي اثر 5000 ارب آهي، هن چيو ته مزدور طبقي جي آمدني ۾ به اضافو ٿيو آهي، 500 کان 600 روپيا ڏهاڙي وٺندڙ اڄ 1000 کان 1200، مستري 2500 روپيا تائين ڏهاڙي وٺي رهيا آهن، اڄ فيصل آباد ۾ سمورا پاور لومز فعال آهن، هن چيو ته وزيراعظم عمران خان جي ڪووڊ – 19 مان سرخرو ٿيڻ جي پاليسي کي دنيا ساراهي رهي آهي، اڪانومسٽ پاڪستاني معيشت کي بهترين قرار ڏنو، مريم ۽ بلال ته شروع ۾ ئي مڪمل لاڪ ڊائون جو مطالبو ڪري رهيو هو، انهن کي مزدورن ۽ ڏهاڙي وارن سان ڪو به سروڪار نه هو، هن چيو ته جيڪڏهن وڌيڪ اگهه وٺندڙ ۽ ذخيره اندوزي جي خلاف ميڪنزم تيار ڪيو ويو آهي، هر هفتي صوبن سان گڏجي ڊيٽا جو جائزو ورتو ويندو آهي، مملڪتي وزير فرخ حبيب چيو ته ڪامياب جوان پروگرام، هائوسنگ جا منصوبا ۽ صحت انصاف ڪارڊ وچولي ۽ گهٽ آمدني وارن طبقن جي لاءِ آهي، گهٽ آمدني وارن گهرن جي تعمير لاءِ بئنڪن کي 154 ارب قرض جون درخواستون مليون، 60 ارب جا قرض منظور ٿي چڪا آهن، ننڍي ۽ وچولي درجي جي صنعتن (ايس ايم ايز) کي اسٽيٽ بئنڪ بنا گارنٽي هڪ ڪروڙ تائين سرمايو فراهم ڪري رهي آهي، ان سان روزگار جا بي شمار موقعا پيدا ٿيندا.
